Sagan & Starfsemin

Sagan & starfsemin

Saga Grensássafnaðar

Grensássókn var stofnuð í september 1963 og fyrsti sóknarpresturinn séra Felix Ólafsson var vígður til starfa í desember það sama ár. Fyrst í stað voru guðsþjónustur haldnar í Breiðagerðisskóla en síðar í safnaðarsal í Miðbæ við Háaleitisbraut.

Safnaðarheimili kirkjunnar var vígt 1972 og var notað sem kirkja safnaðarins allt fram til 1996, en 8. desember 1996 var kirkja safnaðarins vígð og tekin í notkun.

Íbúar í Grensássókn voru í desember 2018, 6864 talsins.

Orgel safnaðarins

Orgel safnaðarins var vígt 23. október 1988. Orgelið er smíðað af dönsku orgelsmiðunum Bruno Christensen og Sønner. Fyrst um sinn var hljóðfærið í núverandi safnaðarheimili sem var nýtt sem kirkja safnaðarins. Við vígslu kirkjunnar 1996 var hljóðfærið flutt í kirkjuskipið og er þar nú.

Sóknarprestarnir og frjáls félagasamtök

Söfnuðurinn hefur alla tíð verið í góðum tengslum við frjáls félagasamtök á vettvangi kristinnar boðunar. Þannig var sr. Felix Ólafsson um hríð kristniboði á vegum Sambands íslenskra kristniboðsfélaga. Séra Jónas Gíslason tók sem unglingur þátt í stofnun Kristilegra skólasamtaka og tók virkan þátt í starfi kristilegu skólahreyfingarinnar.

Sr. Halldór Gröndal sem var lengi sóknarprestur í Grensáskirkju studdi við og tók þátt í starfi Ungs fólks með hlutverk.

Þá var sr. Ólafur Jóhannsson um skeið formaður Prestafélags Íslands og Sambands íslenskra kristniboðsfélaga, samhliða sóknarprestsstörfum sínum.

Námskeiðahald

Mikilvægur þáttir í starfi safnaðarins er að bjóða upp á fræðslu um kristna trú og trúarleg viðfangsefni. Fermingarfræðslan er að sjálfsögðu hluti af þeirri fræðslu. Þá er einnig boðið upp á fræðslukvöld og námskeið í kirkjunni sem eru opin fólki á öllum aldri. Umfjöllun um fræðslukvöld og námskeið verður birt hér.

Safnaðarstarf

Margvíslegt safnaðarstarf er í Grensáskirkju. Má þar nefna barna- og unglingastarf á sunnudögum og miðvikudögum, 12 spora starf og fjölbreytt helgihald. Kirkjukór Grensáskirkju, kórar frá söngskólanum Domus Vox og kvennakórinn Glæðurnar eru þátttakendur í safnaðarstarfinu.